O alcalde de Palas de Rei, Pablo Taboada, recoñeceu que tanto el como os demais investigados na causa penal aberta por mor da denuncia interposta pola exsecretaria municipal están "ansiosos" polo inicio do xuízo, que se celebrará entre os días 13 e 16 de xuño na Audiencia Provincial de Lugo, porque considera que na vista oral poderán "demostrar a súa inocencia".
Na mesma causa, na que figuran como investigadas dez persoas, foron imputados outros edís da corporación local e o exalcalde Fernando Pensado.
No xuízo dirimirase se os investigados cometeron delitos como prevaricación e acoso laboral nunha especie de conspiración para apartar á funcionaria do seu traballo e evitar desa forma que denunciase supostas irregularidades na xestión municipal.
Taboada recordou á prensa que o proceso foi "longo", dado que comezou en maio de 2011, "unha semana antes das eleccións municipais", coa denuncia presentada pola propia exsecretaria.
Asegura que tanto el como os demais investigados afrontan "con tranquilidade" a celebración do xuízo, porque están seguros de que non cometeron "ningún tipo de delito" e, ademais, convencidos de que poderán achegar na vista oral todas as probas que non tiveron ocasión de esgrimir durante o proceso de instrución.
Desde o seu punto de vista, de feito, no xuízo gozarán "da única oportunidade para defender" a súa inocencia que tiveron ata agora.
Recordou que no Concello de Palas de Rei traballaron "multitude de habilitados", cun grao de "satisfacción máxima" por ambas as partes, dado que nunca houbo ningún problema con eles, polo que cualificou a denuncia da exsecretaria "como un caso indesexable" que derivou nunha "situación desagradable".
