O veciño de Cangas Alfonso C.B., acusado de acoitelar e golpear a súa exparella en Valga en outubro de 2015, negou intentar matar á muller e afirmou ante o tribunal que "se quixese matala, ela non estaría aquí".
No xuízo, celebrado este xoves na Audiencia de Pontevedra, o acusado, recoñeceu con todo apuñalar á muller na cadeira nunha ducia de ocasións, unha agresión que cometeu ás cinco da madrugada no interior do domicilio no que ambos residían. Explicou que esa resposta violenta foi debida a un "enfado" porque "non me facía para comer nin nada" e que "me puxen dos nervios" porque non tomara as pastillas que ten recetadas.
Segundo os forenses, o acusado padece un atraso mental moderado e un trastorno hipocondríaco que afecta "moderadamente" á súa capacidade volitiva.
A vítima explicou que, o día dos feitos, o acusado abalanzouse sobre ela e, tras agarrala do pescozo, "empezoume a cravar o coitelo". Tras a agresión, a muller logrou escapar e saír de casa para pedir axuda e, durante a persecución, "díxome que ía coller a machada para cortarme en pedazos e tiralos ao río", chegou a meterlle un coitelo na boca para "cortarme a lingua" e golpeoulle a cabeza contra un muro mentres lle dicía "que mala es de matar". Ao final, a vítima logrou refuxiarse en casa dun veciño, onde caeu.
O xuízo suspendeuse ata o próximo 10 de outubro pois este home, unha testemuña "crave" segundo a fiscal, non compareceu no xuízo e será chamado a declarar de novo.
A Fiscalía solicita para o acusado nove anos e medio de prisión como autor dun delito de homicidio en grao de tentativa, no que concorren as circunstancias agravantes de parentesco e de abuso de superioridade e a atenuante analóxica de alteración psíquica.
