Estados Unidos cambiará o seu veto á entrada de refuxiados por maiores medidas de verificación

O veto á entrada a Estados Unidos de refuxiados de todo o mundo que decretou este ano o presidente estadounidense, Donald Trump, deixou de aplicarse este martes e será substituído "pronto" por un reforzo no escrutinio a eses solicitantes, segundo informou unha fonte oficial. 

Segundo medios estadounidenses, espérase que a Casa Branca anuncie pronto o mecanismo co que espera substituír o veto, que consistirá previsiblemente nunha revisión máis estrita do perfil do solicitante de refuxio, os seus antecedentes e os seus familiares.

A fonte do Departamento de Estado non chegou a confirmar que o cambio se producirá hoxe, pero indicou que varias axencias do Goberno levaron a cabo unha revisión destinada a "intensificar o proceso de escrutinio a quen buscan ser admitidos como refuxiados, para garantir a seguridade dos estadounidenses". 

O veto que deixou de aplicarse este martes emitiuno Trump en marzo pasado, pero non entrou en vigor ata xuño, cando se prohibiu durante 120 días a entrada a Estados Unidos de refuxiados de todo o mundo, un prazo que acaba de terminar sen que o presidente decida estendelo.

O que planea anunciar a Casa Branca, segundo adiantou o diario The Wall Street Journal, é unha serie de restricións que incluirán a recolección de máis datos biográficos dos solicitantes de refuxio, como os nomes dos seus familiares e os seus lugares de emprego. Tamén se fará un maior escrutinio das mensaxes dos solicitantes nas redes sociais, para comparalos coas historias que presentan nas súas solicitudes, indicou o xornal.

Os solicitantes de refuxio en Estados Unidos xa afrontan un longo e estrito proceso que pode durar anos, pero Trump insistiu desde a súa campaña electoral en que entre eles poderían ocultarse terroristas, e a finais de setembro rebaixou a 45.000 o tope de refuxiados que poden entrar durante o ano fiscal 2018.

O mesmo decreto de Trump que entrou en vigor de xeito parcial en xuño prohibía tamén durante 90 días o ingreso de cidadáns de seis países de maioría musulmá (Irán, Somalia, Sudán, Siria, Iemen e Libia).

O prazo para o veto a ese grupo de inmigrantes expirou hai xusto un mes, e entón, Trump decidiu substituílo por un novo decreto que prohibía a entrada ao país dos cidadáns deses países, coa excepción de Sudán, e vetaba tamén aos cidadáns de Corea do Norte e algúns funcionarios de Venezuela. Ese veto entrou en vigor a semana pasada, pero só para Corea do Norte e Venezuela, debido a un bloqueo nos tribunais.