A Consellería de Educación e a maioría dos sindicatos conseguiron desbloquear esta mañá a negociación para abordar a reagrupación das unidades lectivas de face aos próximos cursos e a oferta de prazas para docentes nos centros da Comunidade. Está previsto que ás doce do mediodía a Administración autonómica e os representantes do profesorado, excepto a CIG, asinen un preacordo.
O presidente de ANPE-Galicia, Xullo Díaz Escolante, explicou en declaracións a AGN que ese preacordo contempla a creación de 150 novas unidades lectivas nos dous próximos cursos, o que significa que se habilitarán novas prazas para docentes e mellorará, previsiblemente, a calidade do ensino nas aulas, posto que se reducirá o número de alumnos por clase.
As negociacións, que comezaron á primeira hora da mañá, foron especialmente duras, porque a Consellería de Educación pretendía crear esas novas unidades en tres anos, mentres que os sindicatos limitaban o prazo a só dous cursos. Finalmente, o departamento que dirixe Jesús Vázquez accedeu ás pretensións dos representantes dos profesores, o que permitiu desbloquear unha negociación que se había enquistado nas últimas semanas.
De feito, Díaz Escolante recordou que a intención inicial da Xunta de Galicia era suprimir máis de 400 prazas de docentes en toda Galicia, sen contemplar a creación de novas unidades lectivas naqueles centros cunha elevada concentración de alumnos por aula.
Foi a oposición frontal dos sindicatos, dixo o dirixente de ANPE, a que obrigou á Consellería de Educación a reformularse a súa postura e a aceptar a creación desas 150 novas unidades, que suporán un número aínda maior de prazas para docentes en Galicia.
