Viveiro e Sarria viviron un venres marcado polas mobilizacións educativas, nos dous casos con pais e alumnos implicados, aínda que por motivos diferentes. Na localidade mariñá, os alumnos e a asociación de pais do Vilar Ponte pararon a actividade do instituto máis dunha hora, mentres que na vila sarriá, foi a comunidade educativa do CEIP Frei Luís de Granada a que se manifestou polas rúas.
Os estudantes do Vilar Ponte rebeláronse entre a primeira e a segunda hora de clase, despois de que os pais entrasen no centro para interromper as clases tras presentar un escrito reclamando a presenza do inspector para explicar por que o IES non ten aínda os 43 profesores que ven necesarios para a súa boa marcha e para manter a calidade educativa. Os mozos realizaron unha protesta nos corredores do centro, solicitando a dimisión da nova dirección.
Pola noite, en Sarria, unha manifestación silenciosa, na que participaron unhas 150 persoas, percorreu a Rúa Calvo Sotelo para protestar polo repentino cambio de horario no colexio Frei Luís de Granada, o que obrigou ás familias a reorganizarse case un mes despois do inicio do curso. A marcha, encabezada por unha pancarta na que podía lerse 'Porque as familias tamén contamos. Porque poidamos decidir', transcorreu sen cánticos nin berros de consignas para facer patente o malestar dos pais "polo silencio mantido polas distintas administracións".
