A Deputación insta ao Goberno a que desista de introducir peaxes nas autovías

O grupo provincial do Partido Popular conseguiu sacar adiante no pleno que se celebrou este martes na Deputación de Lugo, coa abstención do PSOE e o voto a favor do BNG, unha moción para instar o Goberno de España a que “desista da súa intención de introducir peaxes nas autovías”.

Os populares precisan nesa moción que a súa intención é promover un debate “máis profundo”, no que participen todos os actores implicados, sobre “o sistema de financiamento da “conservación e mantemento da rede de estradas”, para que “non sexa prexudicial para os usuarios”.

Durante a defensa desa iniciativa, o deputado provincial Carlos Armesto recordou que viaxar entre Lugo e A Coruña podería supor un custo, se a Autovía do Noroeste (A-6) pasase a ter peaxes, de 2,85 euros para os vehículos lixeiros “no escenario máis caro”.

Por iso lamentou que o Goberno se deixe levar “pola improvisación” e pola “falta de planificación”, porque non se pode “cargar máis sobre os autónomos e comerciantes, polo que tampouco podemos tolerar que as autovías se graven”.

“Cando un ministro de Fomento fai unha proposta en sede parlamentaria, hai que darlle validez, porque di a intención que ten”, opinou Armesto, quen tamén dixo que se “logo un secretario de Estado fai a mesma proposta”, entón tal suxestión xa merece “unha resposta”, porque é unha “proposta feita por un Goberno”.

“Nin o señor Aznar nin Rajoy propuxeron pór peaxes nas autovías, é o Partido Socialista quen o propuxo”, recordou.

Segundo Armesto, o Goberno tería que pensar en terminar autovías cuxas obras se prolongan desde fai 20 anos, como a que comunicará Lugo con Santiago, pero non en gravar as existentes.