A vendima na Ribeira Sacra colleu ritmo este fin de semana, despois de que a adega Val de Quiroga abrise a campaña de forma excepcional o pasado día 4. A pesar de que a denominación de orixe aconsella vendimiar a partir do próximo xoves, o certo é que onte xa se traballaba en 16 adegas, segundo sinalou José Manuel Rodríguez, presidente do consello regulador, quen engadiu que as uvas están en perfecto estado a pesar das tormentas rexistradas onte e durante a noite do sábado.
As empresas adegueiras que decidiron adiantar a recolección de uva fano ao constatar que o froito non debe permanecer máis tempo nos viñedos, ao alcanzar o punto xusto de maduración. A maiores, varios produtores prefiren facer agora a vendima e evitar que as condicións climáticas sexan adversas, pois traballar con choiva complica en gran medida o traballo.
