Un mozo de 23 anos de idade veciño de Lugo foi detido tras fuxir dun control rutineiro da Garda Civil cun ciclomotor roubado que levaba placas falsas. O individuo foi identificado polas pegadas recollidas no casco que deixou no lugar ao darse á fuga.
Segundo informou o Instituto Armado, foi detido A.J.P.A., de 23 anos, natural e veciño de Lugo, como presunto autor dun delito de roubo, atentado contra axente da autoridade, contra a seguridade viaria, por desobediencia grave aos gardas e por falsidade documental -polas placas de matricula falsas-.
O 20 de setembro de 2006 foi identificado o usuario dun ciclomotor nun control rutineiro, quen fixo caso omiso ás indicacións dos axentes e fuxiu do lugar, recollendo a patrulla un casco de motocicleta que quedou na zona, o cal foi remitido ao laboratorio de análise para buscar indicios ou vestixios para poder identificar á persoa ou persoas que puidesen manipulalo.
Ademais, foi recuperado o ciclomotor, cuxa subtracción fora denunciada ante a comisaría de Policía e que portaba placas falsas no momento da súa recuperación.
As mesmas fontes indicaron que o informe dactiloscópico do laboratorio permitiu identificar ao mozo que foi posto a disposición dos Xulgados de Vilalba (Lugo).
Usurpación do estado civil
Ademais, a Garda Civil detivo a W.de A.S., de 31 anos de idade, natural do Brasil e veciño de Chantada, como presunto autor dun delito de usurpación de estado civil, tras o que foi posto a disposición do xulgado de Instrución de garda de Lugo.
O individuo acudiu ás oficinas da Xefatura Provincial de Trafico de Lugo para realizar os trámites correspondentes á transferencia dun vehículo, identificándose cun permiso de conducir portugués e un N.I.E. de réxime comunitario, dos que substituíra as fotografías reais.
Doutra banda, o Instituto Armado imputou ás 10.00 horas do luns a M.V.V., de 41 anos, natural e veciño de Vilalba, como presunto autor dun delito e unha falta de danos.
O imputado é o presunto autor, segundo a Benemérita, dun delito de danos nun camión consistentes en varios cortes cun obxecto punzante na lona da plataforma, que quedou totalmente inservible. O valor dos danos foi estimado nuns 1.500 euros. Así mesmo, atribúeselle unha falta de danos por picar dúas rodas a outro vehículo.