Axentes da Policía Local de Vigo detiveron este mércores a un home de 50 anos de idade, M.J.D.R., natural de Portugal e veciño da cidade olívica, por quebrantar unha orde de afastamento da súa muller.
Segundo informaron fontes policiais, os feitos tiveron lugar á primeira hora da tarde, cando o 092 recibiu un aviso de que un home se presentou nun edificio da rúa Martínez Garrido, onde vive a súa muller, e da que ten unha orde de afastamento.
Cando a muller chegou ao edificio, acompañada por unha familia, atopouse ao seu marido (que non pode achegarse a menos de 300 metros dela) no relanzo da planta onde se sitúa a vivenda, polo que ela e o seu familiar saíron á rúa.
Foi ese familiar quen informou á Policía da situación, un relato que foi corroborado pola propia muller cando chegaron os axentes. Estes comprobaron a vixencia da orde de afastamento e detiveron ao home, que continuaba na escaleira.
