Degolou a súa filla de dous anos porque a súa parella rachou a relación

O home, de nacionalidade romanesa, tratou de quitarse a vida tirándose desde un segundo piso, pero non sufriu feridas de gravidade ►Está detido
Agentes en el segundo piso del edificio desde donde un hombre ha intentado suicidarse tirándose desde el balcón tras supuestamente degollar a su hija de dos años
photo_camera Agentes en el segundo piso del edificio desde donde un hombre ha intentado suicidarse tirándose desde el balcón tras supuestamente degollar a su hija de dos años

 Un home de 28 anos foi detido pola Policía Nacional en Alzira (Valencia) tras supostamente degolar á súa filla de dous anos e intentar suicidarse tirándose desde un segundo piso, informaron a Efe fontes da Policía Local e da Policía Nacional.

O suceso produciuse sobre as 17.00 horas no número 12 da rúa Pare Castell de Alzira cando, por causas que se investigan, o home, de nacionalidade romanesa, matou a súa filla cunha arma branca. Os primeiros datos apuntarían a que o desencadeante do crime puido ser que a parella do asasino acabara de comunicarlle a fin da relación sentimental que mantiñan.

Posteriormente precipitouse desde o segundo piso e foi trasladado ao Hospital La Ribera, aínda que ao non ter feridas de gravidade foi levado á comisaría da Policía Nacional en Alzira. Segundo fontes do Corpo Nacional de Policía, foron alertados sobre as 17.00 horas de que un home se lanzou desde un segundo piso e estaba encima dun coche e ao entrar no seu domicilio atoparon morta á pequena.

A nai da nena, que non estaba en casa no momento de ocorrer o suceso, tivo que ser asistida dun ataque de ansiedade e trasladada ao Hospital de La Ribera, segundo fontes sanitarias e de Delegación do Goberno. O home non fora denunciado con anterioridade por ningún caso de violencia.

RECONSTRUCIÓN. O home foi conducido este luns ao domicilio onde se produciron os feitos por axentes do Corpo Nacional de Policía para facer unha reconstrución do crime. Un grupo de axentes da Policía científica desprazouse ao redor das 11.30 horas ata o número 12 da rúa do Pare Castell desta localidade valenciana e o asasino confeso chegou ao domicilio ás 12.20, esposado e custodiado por varios axentes, pouco despois da chegada do persoal do xulgado.

O alcalde de Alzira, Diego Gómez, asegurou a Efe que o municipio está "conmocionado" pola morte da pequena e avanzou que o Concello decretou un día de loito.

Gómez explicou que se trataba dunha familia nova de inmigrantes, de nacionalidade romanesa, acollida na cidade, "onde estaban empadroados", e ao parecer non había denuncias previas.

Este luns o Concello celebrará unha concentración ás 12 do mediodía para que os veciños se solidaricen coa familia e condenen a morte da nena de dous anos, causada presuntamente polo seu pai. Tras este suceso, Save the Children insistiu na necesidade urxente de pór en marcha unha lei que protexa aos menores de todas as formas de violencia.

Nun comunicado, esta organización informou de que nos dous últimos anos máis de 70 nenos e nenas quedaron orfos como consecuencia directa da violencia de xénero, e polo menos sete deles perderon a vida na mesma agresión na que a perdía a súa nai.

En España "a violencia contra a infancia permanece como unha realidade oculta a pesar das cifras coñecidas", asegura a entidade, que engade que en 2015, o último ano do que se teñen datos, rexistráronse 35.913 denuncias por actos violentos contra a infancia.

Para protexer os menores, Save the Children pide a elaboración dunha lei integral que protexa a todos os nenos e nenas de todas as formas de violencia. "É necesario un marco que inclúa medidas de prevención, detección, protección e reparación eficaces que aborde todas as formas de violencia que sofren os nenos", asegura.

comentarios