Despedido un operario da Edar de Lugo e expedientados outros tres

Gestagua, a empresa que xestiona a depuradora de augas residuais de Lugo (ademais da potabilizadora), comunicou este mércores o despedimento a un operario de planta (un oficial de segunda) por razóns organizativas, xa que non necesita do seu servizo, alega. Paralelamente, Gestagua mantén abertos expedientes a outros tres traballadores, pola captación e difusión de fotografías de mostras de auga doutros concellos no laboratorio da planta lucense. Foron divulgadas a través do principal grupo da oposición, o PP. Un dos expedientados é o representante sindical de CC OO.

Gestagua aclarou este mércores que o despedimento e a apertura do expediente son procesos independentes. O feito de prescindir dun traballador débese a que a planta non ten esa necesidade de persoal, afirma.

Sobre a denuncia que o PP fixo de que Gestagua fai na planta de Lugo análise de augas doutros concellos onde xestiona depuradoras, a empresa recoñeceu este mércores a través do seu director de comunicación que así foi nalgún momento, aínda que non puido ofrecer máis explicacións sobre as razóns e outros detalles, coma se é unha práctica habitual. No entanto, Gestagua quixo defender que esa práctica "non supuxo ningún quebranto" para o Concello de Lugo, xa que non incrementou a facturación.

Con todo, o contrato con Gestagua non permite a esta utilizar medios do Concello de Lugo para outros clientes, razón pola que a administración local abriu unha investigación.

Gestagua di que nos próximos días informará as circunstancias polas que realizou no laboratorio de Lugo análise para outros concellos e, á vez que insiste en que iso non supuxo ningún prexuízo para a administración lucense, fai notar que a empresa "non viu incrementada a súa remuneración nos últimos cinco anos, a pesar de que os custos creceron". Non se actualizou sequera o IPC, di.

Esa situación débese a que o contrato do Concello con Gestagua leva outro tanto tempo caducado. A empresa non puido cargar ao Concello o aumento de custos que supuxo o IPC, pero leva varios anos mantendo o servizo sen ter que competir con el por outras empresas, ao non haberse sacado a concurso. Igual situación mantén coa potabilizadora.