Descubertos restos que poderían pertencer a unha vila romana nas Nogais

Patrimonio dos Ancares descubriu restos que poderían pertencer a unha antiga vila romana nas Nogais. Entre os mesmos, este colectivo atopou máis dun centenar de anacos de pezas de barro cocido utilizadas para cubrir os antigos tellados e tres anacos de recipientes cerámicos. Ademais, tamén descubriu a base dun muíño circular construído con granito.

As investigacións comezaron a partir dos restos dunha moeda de bronce que un veciño da zona lles ensinou aos integrantes do colectivo Patrimonio dos Ancares o pasado mes de maio.

Desde ese momento, os membros da asociación iniciaron un arduo traballo de investigación que finalizou coa localización dos restos romanos, cuxos primeiros indicios apuntan a que pertencen a un xacemento situado no concello das Nogais, a menos dun quilómetro da vía romana XIX, segundo precisa o historiador Xabier Moure.

Desde o colectivo Patrimonio dos Ancares indican que este asentamento podería ser unha vila agrícola da época romana. "Cando os romanos comezan a asentarse militarmente no territorio, obrigan aos habitantes dos castros a abandonalos e a establecerse nos vales", explica Xabier Moure, ao que engade que é neste contexto cando xorden as vilas vinculadas ás explotacións agrícolas.

OUTROS ACHADOS. Estes investigadores localizaron máis restos de vilas romanas na comarca dos Ancares, en concreto no Agro de Pedreda e en Quintela (Baralla), en estado de abandono.

Ademais, en Vilarín, na parroquia de Ouselle, xa no municipio de Becerreá, atopouse un friso do século II d. C. O monumento, custodiado no Museo Provincial de Lugo, presenta en relevo unha vaca e un touro.

En Navia de Suarna, doutra banda, descubríronse dúas posibles vilas da época romana onde apareceron varios muíños circulares e fragmentos cerámicos.