Desenvolven a primeira hamburguesa artificial a partir de células nai

Un equipo de científicos holandeses desenvolveu a primeira hamburguesa artificial nun laboratorio a partir de células nai vacúas, formadas unicamente por proteína extraída do tecido muscular do animal.

A revolucionaria hamburguesa degustouse nunha rolda de prensa en Londres na que se presentou o avance, levado a cabo por un grupo de expertos liderados por Mark Post, da Universidade de Maastrich, e financiado con 250.000 euros achegados por Sergey Brin, cofundador de Google.

Aínda que o proxecto atópase aínda nas súas primeiras etapas e aínda non pode producirse a escala global, os investigadores cren que podería contrarrestar o impacto negativo da produción cárnica no medioambiente e axudar a liquidar a crecente crise alimenticia.

Segundo explicaron os expertos na rolda de prensa, o ingrediente principal da innovadora hamburguesa é proteína pura vacina, aínda que o equipo non descarta engadir células de graxa, tamén de laboratorio, para conseguir un sabor máis natural.

A partir das células nai extraídas do tecido muscular da vaca, os científicos conseguiron multiplicar as súas mostras tras alimentar con nutrientes as células e acelerar o seu crecemento mediante sustancias químicas.

Logo de tres semanas de proceso continuado, obtiveron máis dun millón de células nai que foron apartadas en pequenos recipientes onde se fusionaron ata formar minúsculas tiras de músculo, de aproximadamente un centímetro de longo e varios milímetros de ancho.

Unha vez conseguidas 20.000 destas tiras, conxeláronse para máis tarde pasalas a temperatura ambiente e convertelas nunha masa compacta de hamburguesa que pode ser cociñada e en cuxa elaboración participan decenas de millóns de células nai, segundo o profesor Post.

Pero para que esta hamburguesa poida ser un substituto real da carne vacina os científicos aínda traballan para darlle un aspecto máis auténtico, xa que a carne obtida é branca e o seu sabor aínda "non é o bastante bo", recoñeceu o xefe do equipo.

"Se non ten o aspecto da carne normal nin tampouco o seu sabor, non vai ser unha substitución viable", explicou Helen Breewood, outra investigadora implicada no proxecto, en declaracións ao diario británico The Guardian .

Para mellorar estes detalles, o equipo está a tratar de dar unha cor vermella ao alimento ao engadir mioglobina composta de orixe natural, así como células de graxa para mellorar o sabor.

Na rolda de prensa na que se presentou a innovadora hamburguesa, os científicos mostráronse moi positivos cos resultados, ao aludir ás súas repercusións beneficiosas sobre o medioambiente e ao seu potencial para solucionar a escaseza alimenticia de carne no futuro.

"As vacas son moi ineficientes, necesitan cen gramos de proteína vexetal para producir só 15 gramos de proteína animal comestible. Para poder alimentarnos, perdemos unha chea de comida en alimentar ás vacas", indicou Post.

Coa carne cultivada, en cambio, "podemos facelo dun modo máis eficiente porque temos todas as variables baixo control e non necesitamos matar á vaca nin xeramos metano", engadiu o experto.

Segundo os investigadores, a hamburguesa presentada logrou reducir nun 90 por cento a necesidade de terra e auga para producir o alimento e un 70 por cento da enerxía total que se empregou no caso dunha hamburguesa natural.

"Pódese comprobar facilmente que necesitamos alternativas", concluíu o experto.

Outro punto a favor desta hamburguesa de laboratorio é para os seus creadores a alternativa que supón para os colectivos contrarios ao consumo de carne, a causa do sufrimento que padecen os animais.