Denuncian a morte masiva de troitas no río Ulla en Touro

O BNG do concello coruñés de Touro denunciou este domingo a mortaldade "masiva" por causas descoñecidas dunha gran cantidade de troitas ao pé da presa de Brandariz, no río Ulla. Esixen á Consellería de Medio Ambiente que "tome cartas no asunto e analice seriamente o que está a ocorrer".

A formación nacionalista explicou nun comunicado que non se coñece a causa da morte destas troitas que se atopan tanto na canle como na beira do río. Como hipótese "máis probable" barallan a falta de osíxeno ou unha vertedura de lodos do propio encoro.

Xoán Louzao, membro da asemblea local do BNG de Touro, explicou que na zona onde se achan as troitas mortas -na canle baixa do río e a uns 60 quilómetros da súa desembocadura- non hai nin casas nin industrias ás que se lle poida atribuír un suposto vertido.

Por iso, este luns realizarán un percorrido ao longo do río para comprobar se hai máis zonas afectadas e o problema "vai ser máis serio".

A pesar de todo, o BNG de Touro asegurou ter claro que polo menos parte da culpa deste suceso tena a "herdanza envelenada" do anterior Goberno ao recordar que na zona hai tres encoros consecutivos en 10 quilómetros de río.