As oficinas de Banesto de Castro de Ribeiras de Lea, San Cibrao, Cospeito e Vilanova de Lourenzá pecharán durante o mes de agosto, segundo confirmou onte o responsable da sección sindical de banca da CIG, Manuel Valcárcel. Durante este tempo, os clientes deberán realizar as súas xestións noutras sucursais do banco.
Trátase de oficinas que, segundo os datos de Banesto, sofren un descenso importante na súa actividade durante os meses de verán e esta medida pretende optimizar os recursos e paliar a incidencia negativa desta redución, sen necesidade de eliminar puntos de atención nin postos de traballo durante o resto do ano.
Manuel Valcárcel explicou que se trata dun proxecto piloto que o banco porá en marcha o próximo verán e que aínda está suxeito a cambios.
Vacacións
A entidade bancaria pretende que os empregados das oficinas afectadas gocen das súas vacacións durante o mes de peche, é dicir, en agosto. En caso de non ser posible, serán recolocados durante ese período noutra sucursal, dentro da contorna de mobilidade establecido no convenio colectivo. Na actualidade, o citado regulamento fixa un desprazamento máximo de 25 quilómetros, con compensación de gastos para o empregado.
Manuel Valcárcel indica que «acabamos de decatarnos hai dous días desta medida e aínda non sabemos como van responder os empregados». Avanza que «se todos chegan a un acordo para desfrutar das vacacións ou trasladarse a unha oficina axeitada por nós non haberá problema». No entanto, indicou que os representantes da central sindical manteranse alerta para comprobar que se respectan os dereitos dos traballadores.
