Correos puxo este venres en circulación un millón de selos para conmemorar o centenario do diario El Progreso, nun acto que tivo lugar na Xefatura Provincial de Correos de Lugo co matasellado dun destes.
A presentación reuniu ao director de Correos en Galicia, Ricardo Martínez Bereijo, acompañado polo subdelegado do Goberno en Lugo, Jesús Otero, e a presidenta do Grupo El Progreso, Blanca García Montenegro, ademais de autoridades como o alcalde de Lugo, José López Orozco; o presidente da Deputación Provincial, José Ramón Gómez Besteiro, e o vicepresidente, Antón Bao Abelleira.
O selo do centenario de El Progreso púxose en circulación cun valor postal de 0,31 euros. Ademais, Correos concedeu á empresa lucense un cuño de primeiro día de emisión, dentro da serie Diarios centenarios, no que se pode pode ver a histórica cabeceira do xornal e o logotipo oficial dos actos para conmemorar os cen anos de vida deste diario.
Cunha impresión realizada en huecograbado sobre papel estucado, o selo, ademais dos motivos que aluden ao propio centenario, reproduce unha obra do pintor lucense Joaquín García Xesto, creada especialmente para esta efeméride, na que se pode ver a imaxe simbólica dunha árbore cuxo tronco, aínda que parece roto, permítelle manterse en pé.
García Montenegro destacou a relación que uniu a El Progreso con Correos desde a súa fundación, en 1908, porque grazas á función deste servizo o xornal chega cada día a moitas zonas da zona rural e ata do estranxeiro, onde residen moitos lucenses que seguen as noticias da súa terra a través do diario.
Na mesma liña, fixo unha comparación entre o servizo público que presta a administración postal e El Progreso, porque o "correo é o primeiro transmisor de noticias, neste caso persoais, mentres que a prensa transmite as noticias para toda unha comunidade".
A presidenta do Grupo El Progreso aproveitou a súa intervención para agradecer "de todo corazón" á empresa pública a emisión do selo conmemorativo, porque se trata "dunha homenaxe que dá lugar a que toda España e o mundo enteiro poidan coñecer este anaco de Galicia", dixo en alusión a Lugo, "porque non só representa ao noso xornal, senón tamén a Galicia".
Jesús Otero, que exerceu como mestre de cerimonias, tamén afirmou que "El Progreso e Correos están intimamente ligados" e recordou os seus tempos de mocidade, "cando estabamos a esperar ás portas da oficina postal a que chegase o xornal para decatarnos das últimas noticias, especialmente o luns, cando viñan as clasificacións deportivas, porque o correo era naquela época a gran autoestrada da comunicación".
Martínez Bereijo, que definiu a El Progreso como "un dos xornais máis emblemáticos e arraigados na comunidade galega”, destacou o feito de que o xornal lucense sómese “ selecta lista dos Diarios centenarios", unha serie coa que Correos quere recoñecer o labor destes rotativos, que "foron testemuñas do devir da sociedade española no último século". En España son uns trinta, segundo recordou.
Desde hoxe, o diario con maior difusión da provincia de Lugo e terceiro de Galicia, con 103.000 lectores, forma parte do inventario de xornais españois que contan cun selo conmemorativo, unha lista na que aparecen cabeceiras con tanta soleira como a do ABC ou a doutro diario do grupo, o Diario de Pontevedra.
