miércoles. 26.01.2022 |
El tiempo
miércoles. 26.01.2022
El tiempo

Conservas Alonso pechará a súa fábrica de Celeiro con 40 traballadores

Trabajadoras de Conservas Alonso en Celeiro, en una imagen de archivo
Trabajadoras de Conservas Alonso en Celeiro, en una imagen de archivo
Traslada no prazo de dous meses a produción a Bueu, onde ofrece recolocar ao seu persoal, formado en boa parte por mulleres do municipio de Viveiro

O pobo de Celeiro sufriu este xoves un mazazo co anuncio por parte da dirección de Conservas Antonio Alonso de que no prazo de dous meses pecharán a fábrica da localidade para concentrar toda a súa produción en Bueu. O persoal, formado por 20 traballadores fixos e outros tantos fixos descontinuos, ten a opción de continuar traballando na nova localización coas mesmas condicións.

O director xeral da empresa citou ás dúas da tarde deste xoves aos traballadores para comunicarlles a noticia e fíxoo con moito dor. "O home choraba", comenta unha persoa empregada na fábrica. Transmitiulles que a empresa pasaba un momento delicado tras o incendio que sufriu en 2012 a fábrica de Bueu, que foi remodelada por completo. "A fábrica facturaba menos, xa non se traballaba con marcas brancas e era moito gasto ter aberta a de Celeiro", transmite.

A partir de agora haberá novas reunións e cada traballador deberá analizar o seu caso particular, xa que o traslado a Bueu trastorna as súas vidas. A conserveira, que en Celeiro prepara bonito e atún coa marca Palacio de Oriente, está instalada na localidade vivariense desde 1925 e emprega na súa maioría a mulleres, as fixas descontinuas de entre 53 e 64 anos. A maioría do persoal é do propio municipio de Viveiro, boa parte de Celeiro e o resto de parroquias como Covas ou Galdo, aínda que tamén hai de San Cibrao. Moitas das traballadoras levan décadas na conserveira.

A dirección deu un prazo de dous meses para o traslado, pero ata entón traballarán con normalidade e, de feito, está a piques de entrar outra remesa de bonito. Os traballadores fixos están todo o ano e os descontinuos dependendo da carga de traballo, que foi intensa a semana antes de Semana Santa, cando incluso tiveron que facer horas adicionais.

As reaccións a esta decisión son desiguais, e mentres a uns cústalles aceptala, outros chegan a entendela. "Eu véxoo normal, ou que pasa é que levas aí toda a vida, traballaches como se fose para ti, e é unha pena para a zona, porque é unha empresa de corenta empregados", comenta outra persoa que traballa desde hai moitos anos na conserveira.

Conservas Antonio Alonso S.A. é a empresa conserveira en activo máis antiga de España e foi fundada en Vigo en 1873, onde segue tendo a súa sede central. A planta de Bueu, remodelada tras o incendio, conta coa tecnoloxía máis punteira do sector, segundo destaca a empresa na súa propia páxina web.

Conservas Alonso pechará a súa fábrica de Celeiro con 40 traballadores
comentarios