A Audiencia Provincial acaba de ratificar a sentenza en primeira instancia do xulgado do Penal número 1 que absolve a un gandeiro copropietario dunha cooperativa de Alvarín (Guntín) ao que os seus socios acusaron de matar 152 reses con eutanásicos, tirar intencionadamente leite da explotación e causar danos nas instalacións por valor duns 230.000 euros.
Neste fallo, a Audiencia recorda que no de primeira sentenza xa se concluía que non quedara acreditado polos socios denunciantes ningún dos feitos dos que culpaban a este gandeiro, que achacaban a unha vinganza por sentirse marxinado.
Ademais, a Audiencia fai fincapé tamén en que "a xulgadora realizou unha valoración en conciencia da proba práctica no acto do xuízo, observando directamente o alí ocorrido, o que abarca non soamente a observación do contido das afirmacións, senón tamén a observancia directa do modo e forma en que aquelas levaron a cabo", en referencia a "xestos, evasivas ou silencios" nas intervencións de denunciantes e demandado.
A Audiencia incide en que "a xulgadora realizou unha valoración en conciencia da proba práctica no acto do xuízo, observando directamente o alí ocorrido"
Segundo a Audiencia Provincial, esa valoración da xuíza, que se cuestionaba no recurso presentado polos socios do cooperativista, "ha de ser mantida, salvo que resultase incoherente, arbitraria ou ilóxica, o que neste caso non se observa".
O tribunal continúa sinalando que a xuíza, unha vez examinada a proba practicada no acto de xuízo, chegaba á conclusión de que "non entendía achegada proba de cargo capaz de enervar a presunción de inocencia do acusado". Engade que, non pode "volver a reexaminar aquelas probas persoais, directamente observadas pola xulgadora, e que resultaron transcendentais para a adopción da súa decisión", tras o que se apoia na xurisprudencia para xustificar ese razoamento.
O fiscal pediu no seu día unha pena de tres anos de prisión para o denunciado por estes feitos.