A vendima na Denominación de Orixe Ribeira Sacra comezou este xoves oficialmente, de acordo coa data recomendada polo consello regulador, aínda que varias adegas iniciaran nos días previos os traballos de recolección, de modo que xa cultivaran uns 173.126 quilos de uva.
Como é habitual, a maior porcentaxe de uva recollida nestes inicios da campaña é da variedade preferente mencía, un total de 102.076 quilos, aínda que tamén entraron xa nas adegas uns 37.125 quilos de godello ou 16.564 de albariño, ambas as variedades brancas.
Nestes momentos, das 92 adegas que poden elaborar viño ao amparo da denominación de orixe nesta campaña, 25 están a realizar os traballos de vendima.
O consello regulador prevé que durante a última semana de setembro e a primeira de outubro se realice a maior parte da recollida da uva nos viñedos".
De momento, a uva que está a entrar nas adegas presenta un estado "fitosanitario bo", porque as choivas dos últimos días foron moi beneficiosas.
Ademais do persoal técnico habitual, están a realizar labores de control de calidade un total de 13 técnicos veedores contratados para esta campaña.
