A presenza do oso na serra do Courel é todo un referente despois de rexistrarse varias incursións desde hai un par de anos. As visitas esporádicas dos plantígrados xa non sorprenden a veciños, expertos nin administracións. Todos indican que era o esperado e que por iso se traballa desde hai tempo na conciliación desa realidade.
A constatación deses presaxios é evidente despois de que estes días un exemplar ou máis de osos entrasen nun colmear de Vieiros, tal como sucedeu hai pouco en Seceda. Os seus donos, "máis que satisfeitos porque o regreso do oso ao Courel implica unha nova vía de promoción válida para todos, aínda que agora falten medidas de protección", dixo o biólogo e membro de SOS Courel Orlando Álvarez.
Este courelés, do mesmo xeito que os donos das colmeas onde entraron os osos, dan conta "dunha sensación inexplicable polo regreso do oso. Dalgunha forma, entre todos, tanto a xente da serra como a de fóra, fixemos as cousas ben para que o oso regresase a esta zona, cando levaba anos sen penetrar e refuxiado na área de Asturias e Oencia. Agora hai que traballar no seu mantemento", dixo Orlando Álvarez.
O portavoz de SOS Courel, membro tamén do colectivo Fonte do Milagre, de Froxán, destacou a boa acollida dos apicultores onde o oso entrou para alimentarse. "Iso é unha cousa primordial, que non haxa reticencias, aínda que hai que protexer esas albarizas con pastores eléctricos para intentar que tanto os apicultores como o resto da xente con cultivos atractivos para o oso poida manter a súa actividade económica".
Os propietarios dos colmenares e das agrupacións SOS Courel e Fonte do Milagre soamente solicitan "unha aposta da Xunta pola preservación do oso na serra. Sabemos que hai intención dende a Consellería de Medio Ambiente e que facilita pastores eléctricos para as albarizas de toda esta serra. É unha boa iniciativa, pero hai que seguir con propostas para que a xente vexa que o oso non é un animal perigoso, senón que é un recurso para esta comarca ao igual que o lobo".
O turismo que recibe a serra courelesa está afeito a visitar espazos nos que se explica que habitaron osos e lobos. "Non se trata de velos, aínda que no futuro podería haber reservas con animais en cautividade, como en Asturias", apuntou Orlando Álvarez.