O lume puxo en xaque onte á provincia de Lugo ao deixar, entre outras incidencias, por centos de palenses sen telefonía fixa nin internet -servizos que aínda se estaban restablecendo, de forma paulatina, ao peche desta edición- e causar alarma entre os veciños de Outeiro de Rei e Guitiriz, ao achegarse as chamas ás vivendas.
O incendio que afectou á telefonía de Palas -sobre todo no centro urbano- orixinouse ao redor das oito da mañá en Montecalvo, na parroquia monterrosina de Marzán.
Rexistráronse dous focos simultáneos a ambos os dous lados da N-547, entre O Marco e Irixe e, aínda que a superficie afectada non foi elevada -unhas catro hectáreas de terreo, a maioría de monte raso-, as chamas calcinaron instalacións de fibra óptica existentes na contorna da Costa de San Simón, que dan servizo ao centro urbano palense e a algunha parroquia.
