Dúas das máis céntricas arterias de Monforte, a Avenida de Galicia, entre o cruzamento coa Rúa Ourense e a intersección dos xulgados, e a Rúa Roberto Baamonde, entre a rotonda do Parque dos Condes e os xulgados, estiveron sen iluminación pública toda a noite e a madrugada do luns ao martes. Só funcionaron as luces dos semáforos e os carteis luminosos dos establecementos e, finalmente, na mañá deste martes a brigada encargada do mantemento eléctrico decatouse de que a orixe do problema estaba nun cable cortado.
Segundo explicou o concelleiro de servizos, José Luís Rodríguez Rivera, o cable que causou os problemas é exterior e está a unha altura considerable polo que o máis probable é que o rompese un camión que transitaba pola rúa.
Pero a avaría desatou as críticas dos veciños, tanto por estar sen luz como pola incerteza do ocorrido.
