Cazado un motorista de Bueu a 139 km/h nun tramo a 50 en Redondela

A Garda Civil investiga a un veciño de Bueu de 35 anos de idade por circular cunha motocicleta a 139 quilómetros por hora nun tramo autorizado a 50 na estrada N-552, ao seu paso por Redondela, informaron fontes do instituto armado. A motocicleta foi detectada o sábado ás 20.10 hora no quilómetro 3,5 da citada vía.

O condutor foi identificado posteriormente e notificado como investigado pola comisión dun presunto delito contra a seguridade viaria. Trátase do terceiro caso de exceso de velocidade delituoso de motocicletas no que vai de mes e o segundo consecutivo no partido xudicial de Redondela.

O Código Penal estipula para cando se supera en 60 quilómetros por hora a velocidade establecida reglamentariamente en vía urbana ou en 80 en vía interurbana, unha pena de prisión de tres a seis meses ou á de multa de seis a doce meses ou traballos en beneficio da comunidade de 31 a 90 días.