«Responsabilidade» foi a palabra máis repetida onte polos populares na presentación oficial de Javier Jorge Castiñeira como candidato do PP á reelección para a alcaldía en Foz. Un acto que converte ao actual rexedor no primeiro e único cabeza de lista que se dá a coñecer para as eleccións de maio de 2015 por parte do PP; un feito que non se pode illar da situación política que se vive no municipio e que leva ao partido a tratar de diferenciarse do resto. «Estabilidade fronte a combustión» é o que defende o presidente provincial, Xosé Manuel Barreiro, quen ve en Castiñeira á persoa ideal para liderar aos focenses catro anos máis.
«Creo que en Foz temos dado unha lección de lealdade e compromiso» aseverou Barreiro, a pesar de que, recordou, é a única alcaldía que gobernan en minoría, xunto con Guitiriz. Unha circunstancia que, xunto coas dificultades económicas nun contexto de crise, non lles impediu levar a cabo un proxecto en positivo, pois «tratar de resolver problemas e non de crealos».
