Silva esixe "medidas drásticas" contra o "autobús do odio" de HazteOir

A presidenta da Deputación de Pontevedra, Carmela Silva, esixiu este xoves a adopción de medidas "drásticas" contra a campaña iniciada pola asociación HazteOir, ao entender que o seu "autobús do odio" atenta contra os dereitos e liberdades das persoas con orientacións sexuais diferentes. 

"É insoportable e inadmisible que no século XXI poidan suceder actuacións semellantes", asegurou Silva, en declaracións aos medios de comunicación. 

A presidenta asegurou sentirse "avergoñada" pola existencia de asociacións que defendan este tipo de posturas que "van en contra" da propia Constitución Española, que establece a igualdade e a "non discriminación" por razóns de sexo, raza ou relixión. Unha sociedade, engadiu, só é "decente, democrática e avanzada" cando respecta a liberdade da xente. 

Carmela Silva fixo estas declaracións durante a inauguración en Caldas de Reis (Pontevedra) dunha exposición que busca dar visibilidade á diversidade e previr actitudes discriminatorias pola orientación sexual e a identidade de xénero dos menores. A exposición, organizada pola Deputación e a asociación Arela, recolle dez fotografías que reflicten diferentes realidades de persoas transexuais ou que, sen selo, transmite unha mensaxe de positivismo e de orgullo cara a este colectivo. 

Con esta exposición, Pontevedra quere converterse nunha provincia que "respecta e defende" a todas as persoas, segundo destacou Carmela Silva, especialmente aqueles que son "discriminados inxustamente". A dirixente socialista recordou que calquera tipo de violencia sobre este colectivo supón unha "vulneración atroz" dos dereitos humanos.