Cáritas de Vilalba pechou a campaña do Nadal con boas sensacións, tras lograr repartir coa operación Quilo máis dun centenar de paquetes de alimentos entre outras tantas familias da parroquia de Santa María e outras próximas.
"A xente respondeu moi ben, a pesar de coincidir con outras campañas, e ademais temos que destacar a colaboración da práctica totalidade das industrias alimentarias de Vilalba", explican desde a entidade, composta por 14 voluntarios.
Aos produtos non perecedoiros doados a través da operación Quilo únense as doazóns económicas, que ascenderon a máis de mil euros. A entidade recadou 800 euros co mercadiño solidario instalado no baixo de Calzados Camba, familia á que agradecen a cesión gratuíta do local, e a Banda de Música de Vilalba entregoulles 328 euros máis, doados no concerto benéfico organizado o 25 de decembro.
E os eventos solidarios aínda non concluíron, xa que o día 16, ás 20.00 horas no auditorio Carmen Estévez, escenificarase a obra Irmás SL, dúas xubiladas modernas no mundo dos guasás e os internés. A entrada será gratuíta, pero se agradecerán os donativos do público.
Desde Cáritas animan a aquelas persoas que estean a pasar apuros a porse en contacto cos servizos sociais municipais ou cos párrocos para pedir axuda. Ademais, recordan que todos os primeiros xoves de mes na casa parroquial, a partir das 17.00 horas, repártense alimentos.
Os voluntarios, que se reunen todos os xoves e tamén o primeiro mércores de mes co párroco Uxío García, inciden tamén na necesidade de sumar "savia nova", polo que animan aos veciños a facerse voluntarios.
Cáritas de Vilalba repartiu coa operación Quilo máis de cen lotes de alimentos
As campañas benéficas permitiron á entidade recadar máis de mil euros en Nadal