Cardioloxía e Oncoloxía do Hula, finalistas dos premios Best in Class

Os servizos de Cardioloxía e Oncoloxía do Hula, á fronte dos que están Carlos González Juanatey e Sergio Vázquez Estévez, quedaron entre os cinco finalistas da súa categoría nos premios anuais Best in Class, que organizan Gaceta Médica e a Cátedra de Innovación e Xestión Sanitaria da Universidade Rei Juan Carlos. Os premios entregaranse o día 10 en Valencia, onde se desvelará que servizos sanitarios son recoñecidos como os mellores de España.

O Hula sinalou o venres que o servizo de Cardioloxía leva xa varios anos situándose na lista dos cinco mellores servizos desa especialidade segundo Best in Class.

Na selección entrou tamén este ano o servizo de Oncoloxía, seleccionado en concreto pola unidade de tumores de próstata e urolóxicos.

Os premios Best in Class buscan recoñecer anualmente os mellores servizos hospitalarios españois, xa sexan públicos ou privados. Ademais de ser recoñecidos pola súa calidade asistencial, os servizos gañadores e finalistas pasan a formar parte de Guía de Mellores Hospitais e Servizos Sanitarios de España.

A concesión dos premios baséase na puntuación obtida polos candidatos no Índice de Calidade Asistencial ao Paciente (Icap). Trátase dunha ferramenta que avalía aos hospitais, unidades, servizos e centros de saúde, a partir de criterios obxectivos, sinalou o venres o Hula.

O xerente da Estrutura de Xestión Integrada de Lugo, Cervo e Monforte de Lemos, Ramón Ares, manifestou o venres a través dun comunicado que o feito de que eses dous servizos do Hula sexan finalistas dos premios supón un recoñecemento para os profesionais do Hula, que traballan coa satisfacción de ofrecer un servizo de calidade.

Nese sentido, desde o Hula púxose de relevo que cada ano concorren máis de 500 candidaturas a eses premios de calidade, o que daría medida do valor da presenza dos servizos do hospital de Lugo entre os finalistas.

Desde o hospital tamén se puxo en valor que a cátedra de Innovación e Xestión Sanitaria da Universidade Rei Juan Carlos colabora no proxecto, mediante o establecemento dun sistema independente e fiable que permite facer o seguimento do proceso de avaliación da calidade asistencial. Tamén as distintas sociedades científicas colaboran na elaboración e actualización dos cuestionarios que serven para avaliar a calidade en cada unha das categorías que se convocan.