O alcalde de Negueira de Muñiz, o socialista José Manuel Braña, prevé que o próximo verán comecen as obras de selado do vertedoiro de lixos do municipio, situado en Pedras Apañadas.
Braña reuniuse esta semana co secretario xeral de Calidade e Avaliación Ambiental, Xusto de Benito, quen lle manifestou a súa intención de axilizar os trámites de clausura do vertedoiro. «Están moi interesados en acabar axiña», explicou o alcalde, polo que cre que se cumprirán os prazos e os traballos de selado e rexeneración da contorna poderán empezar en breve.
A partir dese momento, o Concello de Negueira de Muñiz enviará o seu lixo a Sogama, a través da planta de transferencia de Becerreá. O alcalde explica que a Xunta mostrou a súa disposición a subvencionar dalgún modo o traslado dos residuos, pois suporá un sobrecusto para as arcas municipais.
