Sete comunidades, entre elas Galicia, permanecerán este xoves en alerta por frío ou neve ante o avance dunha borrasca moi profunda que a Axencia Española de Meteoroloxía (Aemet) denominou Filomena, que deixou xa mínimas históricas e que fará que a situación empeore a partir de mañá.
A Aemet prevé temperaturas mínimas de ata 9 graos baixo cero no val de Liébana en Cantabria e de -8 en Asturias, nas zonas suroccidental e Picos de Europa, mentres que nas montañas de Lugo e Ourense alcanzarán os -7 e -6 respectivamente.
Os primeiros efectos de Filomena, que avanza polo Atlántico, sentíronse xa en Canarias en forma de temporal de vento —con refachos xeneralizados de 70 a 80 quilómetros por hora—, mar —ondas de 4 a 5 metros— e choivas, e prolongarase ata o sábado.
PREVISIÓN. En canto á previsión para Galicia, os ceos estarán pouco nubrados ou despexados, con algúns intervalos de nubes baixas na metade norte.
Non se descarta algunha choiva débil e dispersa no litoral ao norte de Fisterra e algunha bruma matinal no terzo norte de Lugo, máis probables no nordeste.
As temperaturas manteranse con poucos cambios. Haberá xeadas débiles xeneralizadas, máis intensas en zonas de montaña do sueste. Vento frouxo do leste e nordeste, algo máis intenso no litoral.
Ferrol 0º 10º
Lugo -1º 5º
Ourense 1º 7º
Pontevedra -1º 11º
Santiago de Compostela -1º 8º
Vigo 1º 12º