A Bonoloto deixa 48.500 euros cun premio de segunda categoría en Guitiriz

O sorteo da Bonoloto celebrado na noite do sábado 25 deixou un premio de segunda categoría -consistente en cinco acertos máis o complementario- en Guitiriz, dotado con 48.596,43 euros.

O boleto premiado foi selado na administración número dous de Guitiriz, O Milenio de Ouro, situada na Nacional VI ao seu paso polo centro urbano, e a combinación gañadora correspondeu aos números 7, 18, 25, 37, 40, 45 e o 34 como complementario.

A repartición de premios contou cun acertante de primeira categoría, dotado con 557.347,67 euros e cuxo boleto se vendeu na administración de loterías número sete de Ferrol, situado en Caranza.

En segunda categoría houbo outros dous acertantes, ademais do de Guitiriz, que selaron as súas combinacións na administración dez de Lorca (Murcia) e na tres de Alcobendas (Madrid).

Ademais, rexistráronse 60 acertantes nos premios de terceira categoría; 3.999 nos de cuarta e 70.211 nos de quinta, nun sorteo no que a recadación superou os 1,9 millóns de euros.

Manuel Díaz, responsable do Milenio de Ouro, mostrou a súa satisfacción por conceder este premio, o primeiro da Bonoloto que dá na súa administración. "Da Primitiva dera, pero da Bonoloto é a primeira vez. Agora só me falta dar algún na Lotería Nacional do sábado", explicou.

Apuntou ademais, con humor, que isto sirve para que os clientes "polo menos saben que pode tocar" un premio nestes sorteos. "Todos os días escoito a típica frase nunca toca nada, pero si que toca. O que pasa é que non pode tocar a todos", comentou o loteiro guitiricense.