Os bombóns foron os protagonistas este domingo en Ribadeo. ás 18.00 horas foi a presentación da tenda de Chocolates Moreno e das súas novas instalacións, á beira da antiga fábrica, na céntrica rúa Ramón González. Máis de dous centenares de persoas asistiron ao evento, onde se puideron degustar os bombones de mar, que tanta expectación levantaron nos últimos meses, así como os troncos do Camiño, as rocas das Catedrais e os bombóns en forma de chupa chups, todo aderezado cun viño español e o chocolate Moreno, que sempre ten unha gran acollida.
Ao acto acudiu, entre outros, o alcalde de Ribadeo, Fernando Suárez Barcia, acompañado da súa muller. "Estivo toda a tarde cheo, recibimos a máis de 200 persoas", dicía, emocionada, María José Ríos, propietaria de Chocolates Moreno, que traballou xunto á súa familia os últimos días para ter todo a punto para este día tan especial.
Os responsables da empresa deron un paso xigante para converterse non só nunha referencia en canto ao chocolate e o cacao, que xa vendían na súa antiga tenda, senón agora tamén respecto dos bombones. "Son produtos adaptados ao que hoxe pide a sociedade, bombones ecolóxicos, que é o que tratamos de facer co bombón de mar, que leva algas", di María José Ríos, a capitá desta gran empresa con moito prestixio na zona oriental da Mariña.
A inauguración contou coa presenza de máis de dous centenares de persoas, entre os que estivo Fernando Suárez Barcia
Sen dúbida, ese bombón de mar foi o que máis atención captou entre os asistentes. "Dinme que está moi ben conseguida esa combinación entre o sabor da alga e do chocolate, que combina moi ben", dicía Ríos, moi atareada durante toda a tarde. Este é un produto realizado de xeito artesanal, como toda a súa produción, que leva algas de Mar de Ardora, e que se comercializará en caixas de catro e dezaseis unidades.
Nos últimos días, as redes sociais eran un fervedoiro de mensaxes sobre o sabor dos novos produtos que pon á venda esta empresa, que leva 76 anos en marcha, desde 1941, cando a colleu a familia que hoxe segue traballando nela, aínda que xa existía desde 1891.
NOVAS OBRAS. As obras das novas instalacións duraron algo máis de cinco meses e onte foi o día onde abriron as súas portas para mostrar a parte de atención ao cliente. Por detrás queda o obrador, a zona de almacenamento, unha zona de empaquetado e outra de taller, onde se poden facer adornos e detalles para as distintas festas, ademais da zona de oficinas.
A idea de facer unha nova fábrica xurdiu hai dous anos, e foi de xeito imperativo. Desde fai cinco, viñan facendo as rocas das Catedrais, "pero tres anos despois dixéronnos que coa nosa antiga maquinaria non podiamos seguir facéndoas", comenta Ríos. "Dixéronnos que non podiamos facer un novo produto coa mesma maquinaria; entón houbo que facer unha instalación nova e foi cando nos decidimos a facer algo máis, non só as rocas das Catedrais, senón tamén outro tipo de bombóns", comenta a propietaria, que este domingo xunto á súa familia viviu un gran día.
