O home detido na Coruña por un posible caso de violencia de xénero tras a morte da súa parella pasou esta mañá a disposición xudicial, informaron a Efe fontes da Policía Nacional.
O home de 46 anos e veciño da Coruña foi detido onte pola noite despois de que a súa parella, María Belén E.V., coruñesa de 43 anos, falecese ao golpearse na cabeza tras saír despedida do vehículo no que ambos viaxaban na glorieta de Pocomaco.
A Policía Nacional investiga os feitos, que foron presenciados por un axente da Garda Civil fóra de servizo.
Tanto a vítima como o presunto agresor teñen antecedentes por violencia familiar entre eles e de xénero, e poderían sufrir problemas de dependencias, segundo detalla a Delegación do Goberno.
O agresor ten ademais outros antecedentes policiais por violencia de xénero de anteriores relacións e, con respecto á relación coa vítima, constan dúas denuncias sobreseídas xudicialmente.
María Belén recibía axuda no Centro de Información á Muller do Concello da Coruña.
O Goberno, a Xunta, o Parlamento, os partidos políticos e diversas entidades locais e sociais expresaron a súa unánime condena por este posible caso de violencia de xénero, que de confirmarse suporía a cuarta vítima mortal en Galicia e o número 23 que hai que lamentar en España no que vai de ano.
Xogador do Folgueiro
Óscar Pérez Meitín marcou de penalti e no desconto para lograr a vitoria
21/abr./24
