Os ribadenses recibiron con expectación o domingo pola tarde a chegada dun dos cargueiros de maior tamaño que entrou na ría. O Beringdiep mide 105 metros de eslora, cando o habitual é ver no porto comercial de Mirasol embarcacións de 90 metros.
De todos os xeitos, a marca ségueo ostentando «outro que entrou fai máis dun ano e que medía 115 metros», como precisa o práctico portuario, Francisco Javier Torviso, quen aclara que as manobras de acceso producíronse con total normalidade.
O práctico guiou a entrada a porto deste barco, cunhas condicións climatolóxicas e de marea adecuadas e, a pesar das súas dimensións, non houbo ningún tipo de problema para que entrase na ría.
