O ministro de Facenda, Cristóbal Montoro, iniciou pasadas as 12.00 horas o debate no Congreso dos Orzamentos Xerais do Estado de 2017 co apoio practicamente asegurado do PNV tras o acordo entre o Goberno central e vasco sobre a Cota, o que achanda o camiño para as contas públicas.
No entanto, o PNV recordou que este acordo sobre a Cota é unha "condición necesaria pero non suficiente" por si soa para que poida apoiar os orzamentos deste ano.
Os orzamentos para 2017 abordan hoxe o seu primeiro trámite parlamentario, o debate das sete emendas á totalidade que presentaron o PSOE, Unidos Podemos, ERC, PDeCAT, Compromís, Bildu e Nova Canarias e que se votarán na sesión de mañá.
Salvo sorpresas, todo indica que o Goberno conseguirá salvar ese primeiro exame ás súas contas públicas con 175 votos -PP, Cidadáns, PNV, UPN, CC e Foro- a metade exacta da Cámara, suficiente para rexeitar as emendas á totalidade.
Con todo, para o resto da tramitación será necesario contar a metade máis un (176) e é aquí onde o PP espera conseguir o respaldo do único deputado de Nova Canarias, Pedro Quevedo, quen, por agora, pediu a devolución dos orzamentos.
Á sesión no Congreso asiste o presidente do Goberno, Mariano Rajoy, e boa parte o seu gabinete no debate máis importante que se celebra desde a investidura.
Unha vez que Montoro termine a defensa do proxecto de orzamentos, a sesión interromperase ata as 16:00 horas, cando comezarán as intervencións dos portavoces dos grupos parlamentarios.
