Admite que atracou un banco en Parga cun coitelo e acepta máis de catro anos de prisión

O home acusado de atracar hai un ano a punta de coitelo o Banco Pastor de Parga confesouse culpable este mércores no xuízo e aceptou unha condena de catro anos e oito meses de prisión. O asaltante, José David Lema Mille, tamén terá que indemnizar á entidade bancaria en 4.710 euros, a cantidade que levou como botín.

O atraco produciuse o 22 de marzo de 2016, cando o home –de 53 anos de idade e veciño de Malpica de Bergantiños– tocou o timbre do Banco Pastor da localidade guitiricense de Parga, situado na Avenida da Estación. En canto a empregada abriulle a porta, o acusado, sen darlle tempo a reaccionar, esgrimiulle un coitelo duns 30 centímetros de lonxitude, que foi localizado pola Garda Civil no momento da detención. Ademais, preguntoulle se estaba soa e onde gardaba o diñeiro.

Unha vez que a muller lle contestou que non había ninguén máis nas instalacións e sinaloulle o caixón do diñeiro, o acusado ordenoulle que se tombase boca abaixo no chan e colleu todos os billetes e moedas que atopou, que sumaban un total de 4.710 euros.

FUGA. Para facilitar a súa fuxida, o asaltante ordenoulle á empregada que puxese os brazos cara atrás e atoulle estes e as pernas cunhas cordas. Acto seguido, preguntoulle se a porta estaba aberta e abandonou rapidamente a entidade, dándose á fuga nun vehículo Peugeot.

Mentres o atracador abandonaba a entidade, a vítima conseguiu desatarse e foi ela mesma quen deu a voz de alarma e contou á Garda Civil os detalles do asalto. A muller puido ver claramente ao atracador, xa que o home actuou en todo momento de cara.

Os axentes abriron nese momento unha investigación e detiveron ao asaltante a finais de abril de 2016, cando ingresou en prisión provisional, polo que xa cumpriu máis dun ano de condena. Inicialmente, o ministerio fiscal solicitaba para o home unha pena de sete anos de cárcere.

ANTECEDENTES. A Fiscalía lucense aplicoulle ao home o agravante de reincidencia, xa que conta con múltiples condenas anteriores por diversos roubos en Lugo, A Coruña, Pontevedra e Oviedo.

Por todos eses delitos, José David Lema Mille ten ás súas costas máis de 40 anos de prisión, aos que agora se suman os catro anos e oito meses de cárcere que aceptou onte na Audiencia Provincial de Lugo polo atraco de Parga.

Ademais do delito de roubo con violencia e intimidación, o acusado asumiu que foi autor dun delito leve de lesións, xa que a empregada do banco sufriu varios hematomas nos brazos e nas pernas cando a atou coa corda antes de fuxirse. O ministerio fiscal pedía por este delito unha multa de 540 euros, pero finalmente as partes chegaron a un acordo e foi condenado a pagar un total de 180 euros.