A vila de Sarria é un punto estratéxico no Camiño de Santiago ao atoparse a pouco máis de 100 quilómetros de Compostela e ser o lugar elixido por miles de persoas para iniciar a ruta, o que leva a que na localidade nazan negocios relacionados cos peregrinos. O último foi unha oficina receptiva especializada no Camiño, a primeira deste tipo na ruta en Sarria.
As instalacións foron inauguradas polo xerente do Xacobeo, José Paz Gestoso, e a directora de Turgalicia, Carmen Pita Urgoiti. Ademais, o acto contou coa participación do alcalde sarrián, a concelleira de turismo e o presidente da Asociación Provincial de Empresarios de Hostalería de Lugo, así como responsables de establecementos hostaleiros de toda a comarca e doutros negocios relacionados co Camiño.
A oficina, posta en marcha pola axencia Tee Travel, ten como obxectivo ser un «punto de información e contacto» para os camiñantes tanto nacionais como internacionais, explicaron desde a empresa, que asegurou que optaron por Sarria por ser «unha localidade de referencia no Camiño». No mercado estranxeiro céntrase principalmente en persoas procedentes de Europa, Estados Unidos, Canadá e Australia.