Desde que se activou a pasada semana, o día 15, o peche automatizado e a control remoto desde o Centro de Xestión de Tráfico do Noroeste na Coruña para o Alto do Fiouco da Autovía do Cantábrico (A-8), este xa se puxo en práctica ata en catro ocasións debido ás densas néboas que obrigaron a desviar a circulación pola N-634. Rexistráronse aproximadamente 13 horas de peche desde a noite do sábado á mañá do domingo –xornada na que só se puido circular polo viario durante seis hora–. Á tardiña volveu prohibirse a circulación para reabrir ás sete e media da mañá deste luns.
De todos os xeitos, os bancos de néboa dispersos apenas permitiron que o tramo estivese aberto cinco horas, porque para evitar riscos pola falta de visibilidade, o peche volveu ordenarse ás doce e media do mediodía, mediante as indicacións dos paneis instalados e as balizas na calzada que sinalizan o desvío. Ás catro da tarde reabriu, aínda que chegou a haber momentos de aviso vermello, o que obriga a circular a uns 60 quilómetros por hora, entre a densa bruma.
"É un mero afán recadatorio", afirman algúns condutores
Os condutores que atravesaron o tramo que salva Mondoñedo en dirección Abadín topáronse con outro problema á primeira hora da tarde: "Formáronse longas colas e houbo que circular a 40 por hora polo paso dun transporte especial. Se non é a néboa, pasa calquera outra cousa", lamentábanse os usuarios.
Empresarios como o ribadense Agustín Reymóndez que realizan 300 quilómetros a diario, cren que isto é "só un parche. Deben solucionar o problema da néboa xa". Tanto el, como camioneiros e outros condutores, critican a colocación de máis radares: "é un mero afán recadatorio", din.