1-1. O Atlético asegúrase o terceiro posto

O Atlético de Madrid, co 1-1 no Benito Villamarín, asegurouse a terceira praza na clasificación, aínda que non desenvolveu un bo partido ante o Real Betis, que recobrou as boas sensacións ante un potente rival tras camiñar este curso pola mediocridade.

O conxunto colchoneiro, tras o desgaste físico e mental logo de caer eliminado o pasado mércores ante o Real Madrid nas semifinais da liga de Campións, chegou a Sevilla co obxectivo de asegurar matematicamente a terceira posición na táboa e entrar de forma directa a vindeira campaña na fase de grupos da máxima competición continental.

Aos do arxentino Diego Simeone faltáballes un punto para non depender do que fixese o Sevilla no Santiago Bernabéu ante o equipo do francés Zinedine Zidane.

O Betis, pola súa banda, afrontou o partido no medio dun ambiente enrarecido polas últimas goleadas encaixadas ante o Alavés (1-4) e o Leganés (4-0).

Eses resultados propiciaron esta semana a destitución de Víctor Sánchez del Amo e que o ex-xugador bético Alexis Trujillo, que exercía de segundo adestrador, fóra nomeado primeiro técnico para as dúas xornadas que restan.

Coa permanencia asegura desde hai algunhas semanas, a intención dos verdibrancos foi a de despedirse esta campaña dos seus afeccionados no Benito Villamarín cunha alegría e desde o arranque intentárono.