0-1. O Lugo queda sen gol na súa presentación

O Real Mallorca, descendido a tempada pasada a Segunda B, embazou este mércores a presentación do CD Lugo ante os seus afeccionados cun solitario tanto de Pol Roigé cando quedaba media hora para a conclusión do choque (0-1).

O equipo galego enlazara cinco triunfos coa portería a cero desde que caese no seu debut de pretemporada ante o Real Oviedo (1-0), pero a súa serie viuse truncada no debut de Francisco Rodríguez no banco do Anxo Carro.

Os mallorquinos fixéronllo pasar mal aos galegos desde os primeiros minutos do partido, con dúas ocasións claras antes de chegar ao cuarto de hora. O lateral esquerdo Luís Ruiz, unha das caras novas do equipo, salvou baixo paus dous disparos de Pol Roigé no minuto 11 e no posterior, Roberto sacou un cabezazo de José Ángel. 

Antes do descanso, os baleares dispuxeron doutra oportunidade para ver porta, pero Roberto atallou un zurdazo de Joan Sastre. O Lugo só inquedou cun remate de Guille Donoso que despexou a defensa balear e un cabezazo de Seoane que saíu desviado.

Na segunda parte, o Mallorca atopou o gol nunha xogada na que participaron Pierre, Álex López, Rufo e Pol Roigé, que converteu cun potente disparo coa perna dereita.

O Lugo buscou o empate no último tramo do partido, pero non o logrou nin nun remate de cabeza de Iriome nin nun disparo de Fede Vico nin nunha xogada de Cristian Herrera que Dani Escriche foi incapaz de rematar.