Un número indeterminado de persoas morreu, centos permanecen desaparecidas e máis de 6.000 perderon os seus fogares tras derrubarse este luns unha presa hidroeléctrica en construción no sur de Laos.
Nun comunicado, a compañía eléctrica tailandesa Ratchaburi Electricity Generating Holding (RATCH), que participa na construción do proxecto, atribuíu este martes ao derrube do luns "as continuas choivas que causaron a entrada dun gran volume de auga no encoro". As autoridades laosianas non precisaron o número de mortos e limitáronse a informar da perda de varias "vidas humanas" e de que tamén hai "centos de desaparecidos".
A presa, situada a uns 550 quilómetros ao sueste de Vientiane, verteu 5.000 millóns de metros cúbicos de auga que alagaron seis aldeas, segundo a Axencia de Noticias de Laos. Centos de laosianos víronse arrastrados pola riada que alagou as poboacións de Yai Thae, Hinlad, Mai, Thasengchan, Tha Hin e Samong. Imaxes tomadas desde o teito dunha casa alagada e divulgadas nas redes sociais mostran unha paisaxe de auga de cor marrón do que brotan copas de árbores, tellados de zinc e a cúpula dourada dun templo budista. Unha muller laosiana con dous nenos desanoa un cordel sentada nun tellado, cerca atópase un monxe budista de pé, máis afastado outro veciño en crequenas e un máis se cobre cun paraugas.
A compañía eléctrica RATCH asegurou que os residentes das aldeas foron evacuadas a centros temporais
A empresa RATCH afirmou no comunicado que "evacuaron aos residentes do lugar a centros temporais" e están "a realizar unha avaliación urxente da situación para poder resolver inmediatamente a situación unha vez que o nivel da auga da presa baixe". A administración da provincia de Attapeu, onde se constrúe a represa, pediu asistencia humanitaria básica para os afectados, como auga, alimentos, medicamentos e roupa.
O primeiro ministro do país, Thongloun Sisoulith, visitará a zona para supervisar as operacións de rescate e asistencia ás vítimas. A presa derrubada, Xe Pian, xunto ás de Xe-Namnoy e Houay Makchan, forman parte dun plan nacional para aproveitar o traxecto do río Mekong polo país e converter Laos nunha fonte xeradora de electricidade limpa para o Sueste Asiático.
