A compañía enerxética San Diego Gas & Electric anunciou hoxe o restablecemento do servizo eléctrico aos millóns de usuarios afectados polo gran apagamento que deixou sen luz o xoves a zonas de California, Arizona e o norte de México.
A corrente regresou ás 03.25 hora local (10.25 GMT), doce horas despois de que se producise a interrupción da subministración nunha liña de alta voltaxe entre Arizona e California.
O incidente xerouse cando un operario do Servizo de Enerxía de Arizona substituía un equipo nunha subestación próxima á cidade de Yuma, ao sur dese estado, aínda que o vicepresidente desa empresa, Daniel Froetscher, apuntou que era prematuro atribuír o apagamento a un erro humano ata que finalice a investigación.
Estímase que ata 5 millóns de persoas poderían sufrir o corte de luz a ambos os dous lados da fronteira entre México e EE UU., a maior parte residente no condado de San Diego, onde quedaron sen corrente eléctrica 1,4 millóns de clientes que en termos de poboación representan a máis de 3,5 millóns de habitantes..
Na Baixa California, en México, preto de 1 millón de usuarios perderon a súa subministración eléctrica, aínda que na mañá do venres recuperouse a subministración para un 97 por cento dos casos.
O apagamento causou atascos de circulación rodada, así como accidentes debido a fallos da rede de semáforos, atrapou a persoas nos ascensores, detivo os trens nas vías, impediu a saída de voos desde o aeroporto internacional de San Diego e obrigou suspensión de operacións de dous reactores de enerxía nuclear no sur de California.
"Debido a que o proceso de restauración (do servizo) transcorreu sen problemas, San Diego Gas & Electric puido restablecer o fluxo enerxético antes do previsto", explicou a empresa nun comunicado.
