Os doce mozos e o seu adestrador, que foron rescatados tras pasar máis de dúas semanas atrapados nunha cova do norte de Tailandia, comezaron a saír do hospital para ofrecer a súa primeira rolda de prensa, segundo informaron este mércores unhas testemuñas.
Os psicólogos do centro hospitalario declararon na súa primeira rolda de prensa desde o ocorrido, que os 12 mozos, de entre 11 e 16 anos, e o adestrador, de 26, recuperaron a suficiente forza mental e física para regresar ás súas casas e levar unha vida normal.
O grupo levaba internado no hospital de Chiangrai Prachanukroh de Chiang Rai, capital da provincia homónima, desde que foron rescatados en quendas entre o 8 e o 10 de xullo. As autoridades tailandesas prepararon, para a tarde deste mércores, unha conferencia de prensa de 45 minutos que será retransmitida pola televisión local e na que os mozos responderán a preguntas aprobadas previamente polos médicos e psicólogos que os atenden.
Os afectados entraron na cova durante unha excursión o 23 de xuño e quedaron atrapados ata que entre o 8 e o 10 de xullo, os equipos de rescate leváronos por fases ata a bocana de saída da gruta.
