Trump alarma o Senado ao non garantir unha transición "pacífica" se perde

Apupos ao presidente de EE UU na súa visita á capela ardente da xuíza do Supremo: "¡Votemos para que se vaia!"
Trump y su mujer en la capilla ardiente de la jueza Ginsburg en el Tribunal Supremo. EFE
photo_camera Trump e a súa muller na capela ardente da xuíza Ginsburg no Tribunal Supremo. EFE

O Senado de EE UU subliñou este xoves o seu compromiso cun "traspaso pacífico do poder" se o candidato presidencial demócrata, Joe Biden, gaña as eleccións de novembro, despois de que o presidente estadounidense, Donald Trump, se negase a garantir que cedería o mando sen problemas. 

A negativa de Trump a garantir que aceptaría un "traspaso pacífico" do poder se perde o 3 de novembro, expresada o mércores durante unha rolda de prensa, provocou que numerosos membros do seu partido se distanciasen desa postura e que o presidente tratase de matizala, pero sen dar marcha atrás do todo. 

"Queremos asegurarnos de que as eleccións se desenvolven de forma honesta, e non estou seguro de que iso poida ocorrer", dixo Trump este xoves aos xornalistas ao abandonar a Casa Branca rumbo a Carolina do Norte. 

As declaracións de Trump levaron o Senado a aprobar por unanimidade este xoves unha resolución non vinculante na que a Cámara reafirma "o seu compromiso coa transición ordenada e pacífica do poder que esixe a Constitución de Estados Unidos". 

"Non debe haber perturbacións, por parte do presidente ou de ningunha outra persoa no poder, para anular a vontade do pobo de Estados Unidos", advirte a resolución, impulsada polo senador demócrata Joe Manchin. 

A declaración aprobouse cunha rapidez pouco habitual no Senado, de maioría republicana, horas despois de que o líder conservador nesa cámara, Mitch McConnell, se desmarcase dos comentarios de Trump. "O gañador das eleccións do 3 de novembro será investido presidente o 20 de xaneiro. Haberá unha transición ordenada, como a houbo cada catro anos desde 1792", escribiu McConnell en Twitter. 

"Non debe haber perturbacións, por parte do presidente ou de ningunha outra persoa no poder, para anular a vontade do pobo de Estados Unidos", advirte a resolución do Senado

Sumáronse a el outros lexisladores conservadores como os senadores Lindsey Graham e Marco Rubio ou a congresista Liz Cheney; aínda que a maioría de membros do partido evitaron criticar directamente a Trump. 

A que si o fixo foi a presidenta da Cámara baixa, a demócrata Nancy Pelosi, ao afirmar nunha rolda de prensa: "Vostede non está en Corea do Norte, vostede non está en Turquía, vostede non está en Rusia, señor presidente. Vostede está (...) nunha democracia. ¿Por que non intenta honrar o seu xuramento da Constitución de EE UU?". 

A portavoz da Casa Branca, Kayleigh McEnany, intentou frear a polémica ao asegurar aos xornalistas que Trump "aceptará os resultados dunhas eleccións libres e xustas", pero non quixo responder á pregunta de se se axustará a ese principio incluso se perde en novembro. 

Trump insinuou moitas veces que podería non aceptar o resultado das eleccións se non se lle declara gañador, e acusou sen probas á oposición demócrata de estar a orquestrar unha "fraude" ao expandir as posibilidades de votar por correo en varios estados, debido á pandemia. 

O mandatario insiste en que o voto por correo pode favorecer a fraude, algo sobre o que non achegou probas e que é extremadamente improbable que ocorra, como demostraron varios estudos. 

O propio director do FBI, Christopher Wray, recoñeceu este xoves durante unha audiencia ante o Senado que EE UU non detectou "historicamente ningún tipo de intento coordinado de fraude electoral a nivel nacional nunhas eleccións importantes". 

O presidente dixo que cre que o resultado das eleccións estará tan disputado que acabará no Tribunal Supremo

Trump tamén afirmou este mércores que cre que o resultado das eleccións estará tan disputado que acabará no Tribunal Supremo, unha idea que tamén citaron algúns senadores republicanos como xustificación para aprobar antes dos comicios a unha substituta da recentemente falecida xuíza Ruth Bader Ginsburg. 

Preguntado este xoves polo tema nunha entrevista radiofónica, Trump matizou que si estaría "de acordo cunha" potencial decisión do Supremo que non o certificase como gañador. Pero pouco despois, desde Carolina do Norte, insistiu en que quere coñecer o resultado das eleccións o mesmo 3 de novembro, e teme que "as papeletas" enviadas por correo "tarden semanas e semanas en chegar". 

APUPADO NO TRIBUNAL SUPREMO. O presidente empezou o día cunha fugaz visita á capela ardente da xuíza Ginsburg no Tribunal Supremo, onde permaneceu durante un minuto xunto á súa esposa Melania mentres decenas de persoas o apupaban desde a rúa. 

"¡Votemos para que se vaia!", coreaban os cidadáns que esperaban a súa quenda para achegarse ao féretro da maxistrada progresista, que era toda unha icona do movemento feminista. 

Comentarios