Polo menos 19 persoas morreron e 70 foron dadas por desaparecidas nas últimas horas debido ás fortes choivas e tormentas que azoutan desde o martes o oeste de Alemaña, segundo os últimos datos das autoridades das rexións afectadas.
O temporal afectou especialmente aos estados federados de Renania do Norte-Westfalia, o máis poboado do país, e de Renania-Palatinado, onde causou inundacións e o derrube de edificios.
Entre os mortos hai dous bombeiros. Un morreu afogado tras caer á auga e outro a consecuencia dun colapso que sufriu mentres realizaba labores de rescate.
"Vivimos en Renania-Palatinado unhas inundacións de dimensións catastróficas. Somos unha rexión afeita ás inundacións pero o que vivimos é unha catástrofe", dixo a primeira ministra dese estado federado, Malu Dreyer.
"Estamos a loitar por salvar xente. Os danos nos municipios son inmensos", agregou.
O municipio de Ahrweiler, a uns 50 quilómetros de Bonn, é un dos máis afectados. Alí rexistráronse catro mortos e seis edificios caeron como consecuencia da deterioración producida polas choivas e máis de vinte están en perigo.
O número de desaparecidos reportados ata o momento é de 70.
O Servizo de Meteoroloxía Alemán (DWD) espera que as choivas amainen. "Pode seguir habendo fortes choivas nalgúns lugares pero non serán tan estendidas como as da última noite", dixo Markus Mannital, do DWD.
As inundacións obrigaron a cortar o servizo eléctrico en varios municipios para evitar curtocircuítos e o transporte ferroviario na rexión tamén se viu afectado.
Na cidade de Colonia, o Rin desbordouse e alagou parte do barrio de Deutz.
O ministro de Interior de Renania do Norte-Westfalia, Herbert Reul, cualificou a situación de extremadamente " difícil".
Desde o martes hai un dispositivo de equipos de rescate no que participaron 3.900 persoas que tiveron que intervir en distintos lugares en preto de 2.000 ocasións.
