O Supremo tumba o plan de Trump de eliminar a protección a mozos inmigrantes

Esta medida protexe da deportación a uns 650.000 mozos indocumentados
Proc/JFIF/EFE-Calidad:Excelente
photo_camera Donald Trump. EFE

O Tribunal Supremo de EE.UU. decidiu este xoves manter en pé o programa de Acción Diferida Para os Chegados na Infancia (DACA), que protexe da deportación a uns 650.000 mozos indocumentados coñecidos como "soñadores", nun inesperado revés para o presidente estadounidense, Donald Trump.

Nunha sentenza axustada, por 5 votos a favor e 4 en contra, o Supremo concluíu que Trump non seguiu os mecanismos establecidos na lei cando interrompeu en 2017 o programa DACA, creado en 2012 polo expresidente Barack Obama e que permitiu traballar ou estudar a miles de indocumentados que chegaron a EE.UU. de nenos.

"A decisión do DHS (siglas do Departamento de Seguridade Nacional) de acabar con DACA foi arbitraria e caprichosa", escribiu o presidente do Tribunal Supremo, John Roberts, de tendencia conservadora, nun argumento ao que se sumaron os catro xuíces progresistas da corte.

A corte non entrou a valorar a legalidade de DACA, senón que rexeitou "o procedemento" que usou o Goberno de Trump á hora de tombar o programa, e deixou claro que a Casa Branca pode intentar interrompelo de novo se quere, pero é probable que lle resulte complicado facelo antes das eleccións de novembro.

A decisión supón unha enorme vitoria e un alivio para os centenares de miles de "soñadores", que esperaban con nerviosismo un veredicto do que dependen os seus proxectos de vida, que quedaron en limbo desde que Trump anunciou a interrupción do programa hai case tres anos.

"Esta espera está a matarme", escribía este luns a "soñadora" mexicana Reyna Montoya nun tuit.

Moitos deses mozos eran pesimistas sobre a decisión do Supremo, debido a que a maioría conservadora da corte inclúe a dous xuíces nomeados por Trump, Brett Kavanaugh e Neil Gorsuch.

Ambos se opuxeron este xoves á decisión da maioría dos xuíces de manter en pé o programa e alegaron, nun argumento asinado polo maxistrado conservador Clarence Thomas, que a decisión dos seus colegas é "un intento de evitar unha decisión (de Trump) politicamente controvertida, pero legalmente correcta".

Aínda que Trump anunciou a interrupción do programa DACA en 2017, os fallos de xuíces federais obrigáronlle a seguir renovando os permisos daqueles mozos indocumentados que xa eran beneficiarios do programa nesa data, e que baixo a medida, debían actualizar os seus documentos cada dous anos.

En xaneiro, eran uns 650.000 os "soñadores" que chegaron a Estados Unidos antes de 2007, na súa maioría da man dos seus pais, os que aínda mantiñan ese permiso que lles permite vivir fóra das sombras, ao contrario que o resto dos 11 millóns de indocumentados que se calcula residen en EE.UU. 

Trump: "Unha horrible decisión"
Donald Trump tachou este xoves de "horrible" a decisión do Tribunal Supremo e pediu votar por el en novembro para que poida nomear máis xuíces desa corte."Estas decisións horribles e politicamente cargadas que salguen do Tribunal Supremo son como refachos de escopeta na cara da xente que se enorgullece de chamarse republicanos ou conservadores", escribiu Trump en Twitter, en aparente referencia tanto á decisión deste xoves sobre DACA como a outra deste luns contra a discriminación laboral a homosexuais. 

Comentarios