Seúl denuncia ante a Onu o último lanzamento de mísiles norcoreano

Corea do Sur enviou este venres unha mensaxe á Onu para denunciar o lanzamento de dous mísiles de curto alcance levado a cabo na véspera por Corea do Norte, informou unha fonte do Goberno en Seúl.

O Executivo surcoreano remitiu a misiva ao comité de sancións do Consello de Seguridade das Nacións Unidas, segundo indicou a fonte á axencia local de noticias + Yonhap, despois de que o Exército Popular de Corea do Norte lanzase dous mísiles -tipo scud, segundo expertos- que voaron 500 metros ata caer ao mar.

Seúl considera que o lanzamento supón unha violación das resolucións que impiden a Pyongyang realizar probas de mísiles balísticos, polo que reclamou ao órgano executivo da Onu unha "resposta adecuada" a esta acción, segundo a fonte.

O envío dunha misiva ao Consello de Seguridade considérase unha resposta relativamente laxa, xa que se barallaba a posibilidade de que o Goberno surcoreano pedise abrir unha investigación.

En todo caso, o órgano executivo de Nacións Unidas xa impuxo a semana pasada fortes sancións financeiras e comerciais a Corea do Norte pola súa recente proba nuclear e o lanzamento dun foguete espacial considerado un ensaio encuberto de mísiles.

O lanzamento de mísiles de curto alcance do xoves enmárcase na atmosfera de tensión xerada tras esta última resolución da Onu -á que se suman sancións unilaterais de Corea do Sur, EE.UU. e Xapón- e os exercicios militares que Seúl e Washington realizan estes días en territorio surcoreano.

As manobras a gran escala, que se prolongarán ata finais de abril e contan con 17.000 tropas estadounidenses e 300.000 do país asiático, son consideradas un "ensaio de invasión" por Corea do Norte, que lanzou a ameaza dun "ataque preventivo" con armas nucleares.

Norte e Sur atópanse tecnicamente enfrontadas desde a Guerra de Corea (1950-53), que finalizou cun armisticio nunca substituído por un tratado de paz definitivo.