A policía británica informou este venres de que deixou en liberdade sen cargos a seis dos detidos en relación co atentado do mércores en Londres, mentres que outras catro persoas continúan baixo custodia. Os liberados son dúas mulleres e catro homes, de entre 21 e 28 anos, que foron detidos en Birmingham (centro de Inglaterra), a cidade onde vivía o autor do ataque que deixou catro vítimas mortais e 50 feridos. Unha muller de 39 anos que fora detida no leste de Londres como sospeitosa de preparar actos terroristas foi posta en liberdade horas antes baixo fianza.
As forzas de seguridade continúan interrogando a dous homes, de 27 e 58 anos, detidos o xoves en Birmingham, e a un home e unha muller, de 35 e 32, respectivamente, arrestados este venres pola mañá en Manchester (norte de Inglaterra).
Scotland Yard identificou como autor do atentado ante o Parlamento británico a un home de 52 anos que naceu no condado de Kent (sueste de Inglaterra) co nome Adrian Russell e fíxose chamar máis tarde Khalid Masood, ao converterse ao islam. O xefe da unidade antiterrorista de Scotland Yard, Mark Rowley, indicou que a investigación do atentado, na que participan centos de axentes, céntrase en "comprender a motivación, a preparación" e os posibles "asociados" do atacante.
O terrorista lanzou o seu vehículo contra as persoas que camiñaban pola ponte de Westminster e apuñalou despois a un policía, antes de ser abatido por axentes armados. O servizo de saúde inglés (NHS England) informou de que dezasete feridos continúan hospitalizados, e un deles, segundo a policía, está en estado de extrema gravidade.
Saen en liberdade sen cargos seis detidos polo atentado de Londres
Outras catro persoas continúan baixo custodia ► Dezasete feridos seguen hospitalizados e o estado dun deles é de extrema gravidade
