O Goberno británico e a Unión Europea (UE) ultiman os detalles dun acordo de brexit con consenso sobre a fronteira irlandesa e a futura relación comercial, que podería estar listo nos próximos días.
Así o asegura The Sunday Times, que este domingo publica un artigo onde revela "o plan secreto" da primeira ministra do Reino Unido, Theresa May, que conseguiría "en privado" certas concesións de Bruxelas.
Segundo o rotativo, a conservadora May exporá aos seus ministros os termos do posible pacto nunha reunión o vindeiro martes e, se todo vai ben, a Comisión Europea podería anunciar o venres un cume especial para os días 15 ou 22 de novembro.
En decembro, o eventual acordo someteríase a votación na Cámara dos Comúns, indica o xornal, que di consultar a decenas de fontes británicas e comunitarias.
Segundo The Sunday Times, May logrou que Bruxelas acepte que todo o Reino Unido permaneza provisionalmente dentro dunha unión aduaneira se o período de transición posterior ao brexit expirase sen un acordo comercial bilateral definitivo, en lugar de só Irlanda do Norte, o que rexeitaba Londres.
Este plan de continxencia, que se faría legalmente vinculante no tratado de retirada cunha cláusula específica "de saída" -para impedir que se fixese permanente-, evitaría ter que erixir unha fronteira física na illa de Irlanda, o que prexudicaría o proceso de paz de 1998.
A primeira ministra "está a piques de pechar" ademais un acordo político para unha "futura asociación económica" (FEP, polas súas siglas en inglés) cos Vinte e sete, que, segundo o xornal, mantería aberta a opción de asinar un acordo de libre comercio ao estilo do de Canadá -a alternativa preferida polos conservadores partidarios dun brexit duro-.
Tamén permitiría optar por unha maior integración coa UE, en base á proposta defendida ata agora por May, que expón a creación dun mercado común de bens británico-comunitario con equivalencia regulatoria.
Segundo a cabeceira londiniense, Bruxelas fixo unha notable concesión ao permitir que os controis regulatorios dos bens poidan levar a cabo "no mercado" -ou sexa, nas fábricas ou nas tendas- en lugar de na fronteira.
