Polonia enfróntase hoxe unha xornada electoral decisiva para o país

 A participación rexistrada ata mediodía nos comicios lexislativos que se celebran este domingo en Polonia  foi do 16,47% e non se rexistraron incidentes que poidan alterar o horario de votacións, segundo informaron as autoridades electorais.

Transcorridas cinco horas desde a apertura dos 27.000 colexios electorais repartidos por todo o país, o número de votantes é inferior ao que se rexistrou á mesma hora na segunda volta das presidenciais celebradas o pasado 25 de maio (17,40%).

Máis de 30 millóns de cidadáns polacos están chamados ás urnas para elixir os 460 deputados e 100 senadores que compoñen as cámaras de Polonia  e determinar se se manteñen no poder os liberais da primeira ministra, Ewa Kopacz, ou se regresan ao Goberno os conservadores, favoritos nas enquisas con Beata Szydlo como cabeza de lista.

Os líderes dos principais partidos xa depositaron a súa papeleta e recordaron aos seus concidadáns a importancia de votar, unha mensaxe que tamén repetiu a xerarquía católica nunha misiva lida nas parroquias de todo o país.

A comisión electoral confirmou que os colexios pecharán ás 21.00 hora local (20.00 GMT) como estaba previsto, a pesar de que as votacións se interromperon temporalmente nun local de Biskupin (centro de Polonia), despois de que o edificio de madeira onde se situaban as urnas se incendiase por causas aínda descoñecidas, sen que se rexistrasen danos persoais.

Espérase que os resultados definitivos non se fagan públicos ata mañá.