Un individuo armado cun rifle foi abatido pola Policía canadense preto dunha escola primaria de Toronto, dous días despois de que un adolescente matase 19 nenos e dúas profesoras nun colexio de Texas (EE UU).
A Policía revelou nunha rolda de prensa que ao redor das 13.00 hora local (17.00 GMT) deste xoves varias persoas denunciaron a presenza dun individuo armado cun rifle nas inmediacións dun colexio no oeste de Toronto. Pouco despois, un axente disparou contra o individuo, causándolle a morte. A Policía non identificou o falecido e só dixo que era un home novo que portaba unha gorra branca e un chaquetón.
O xefe de Policía de Toronto, James Ramer, cualificou o incidente como traumático para os estudantes, profesores e pais, especialmente tras os tiroteos nas localidades estadounidense de Búfalo e Uvalde nos últimos días.
A presenza do individuo armado obrigou a varias escolas do oeste de Toronto a poñer en marcha protocolos de urxencia e reter os estudantes no interior dos edificios ata que a Policía se asegurou de que non había perigo. As autoridades cren que o incidente é un caso illado, pero a Policía levará a cabo patrullas na área para tranquilizar os veciños.
